Bertso-saio musikatua. Uxue Alberdi, Miren Amuriza, Alaia Martin eta Eli Pagola, aurkezle lanetan, Amaia Agirre. Lau bertsolariak eta gai-jartzailea emakumezkoak dira. Hortik izenburua, oraindik, zoritxarrez, gizonezkoz osaturiko saioak baino ez baitira kasualitatez izaten. Gure helburua noizbait halako saioak kasualitatez, urteko edozein egunetan eta pentsatu gabe ere irtetea litzateke, baina bitartean intentzio osoz antolatzen dugu “Ez da kasualitatea”: umorea, jolasa, gogoeta, emakumeon arteko konplizitatea, musika eta bertsoa uztartzen dituen saioa.